ရင်မခုန်မိအောင်နေရင်
သေရုံပဲရှိတာပေါ့ လူပဲဟာ...
အရိုးနဲ့အရေကိုအုပ်ထားရုံသက်သက်မဟုတ်ဘူး
အထဲမှာတဆတ်ဆတ်လှုပ်နေတဲ့ကောင်ရှိသေးတယ်
ခြံထဲကနွားတွေထက်
ချိုစောင်းထက်တဲ့စိတ်
ကိုယ့်စားကျက်နဲ့ ကိုယ့်စားခွက်
သင်းကွဲလွယ်လွန်းတော့
ခဏခဏ ကွင်းအပြင်ကိုထွက်ထွက်ပြေးမိတယ်။
ငါ့သတင်းကိုထုတ်လွှင့်ဖို့
ရေဒီယိုချယ်နယ်အလွတ်လဲမရှိတော့ပါဘူး
လိုင်းဖမ်းဖို့မကြိုးစားကြတော့နဲ့လေ
မခက်ထန်ပေမယ့် မပျော့ပြောင်းဘူး
မမောက်မာပေမယ့် မရိုကျိုးဘူး
ရာသီဥတုအကူးအပြောင်းမှာ သင့်အသက်အန္တရယ်ကိုဂရုစိုက်ပါ
ရေးလိုက်တာကတော့ ကကြီးရေက
နေရင်းထိုင်ရင်နဲ့ အ သွားတဲ့ ဇာတ်လမ်းတွေကများလာလို့
အိမ်ထဲအိမ်ပြင်ထွက်တာနဲ့
လမ်းပျောက်တာလဲ စိတ်စိတ်လာတယ်။
ငပိကြိုက်ကြိုက် ချိစ်ကြိုက်ကြိုက်
ဘာဂါကြိုက်ကြိုက် ပလာတာကြိုက်ကြိုက်
ဆူရှီကြိုက်ကြိုက် ပူရီကြိုက်ကြိုက်
ကိုယ့်အရသာနဲ့ကိုယ် အံကိုက်ဖြစ်နေတဲ့ သဘာဝရဲ့အပမှာ
ရည်းစားဆိုတဲ့စကားက
ဘာနဲ့တွဲစားစား မျိုလို့မကျတာ နှစ်ပေါက်နေပြီ
ဘယ့်နှယ်မှလုပ်ဖို့ အစီအစဉ်မရှိပါဘူး
ယခုကဲ့သို့ပဲ
ချာလည်..... ချာလည်နဲ့ ... ချာချာလည်လည်ပေါ့။
ဂယက်
No comments:
Post a Comment