မီးပူမထိုးပဲနဲ့ ခေါက်ရိုးကျိုးနေတဲ့ဘဝက
မှန်ကြည့်တာတောင် ကိုယ့်ကိုကိုယ်မမြင်တော့ဘူး
လုပ်ကြည့်ရင်ဖြစ်တယ်ဆိုပေမယ့်
ဖြစ်မြောက်အောင်မလုပ်သေးတဲ့ ရည်ရွယ်ချက်တထွေးက
သပ်သပ်ရပ်ရပ် ခေါက်သိမ်းထားတဲ့
နိစ္စဓူဝ ယူနီဖေါင်းအထပ်ထပ်အောက်မှာ မလှုပ်နိုင်မရှားနိုင်…
ဘာမှမပြီးတာဟာ ဘာမှမလုပ်လို့ဆိုရင်
ဘာမှမလုပ်တာဟာ ဘာမှမဖြစ်လာလို့ပဲလို့ ပြောရမှာလား
တခုခုတော့ လုပ်ခဲ့သားပါပဲ
တခုခုတော့ ဖြစ်ခဲ့သားပါပဲ
သို့သော်….. တခုခုကလွဲလို့ ဘာတခုခုမှမရှိသေးတာက
နောက်ကြောင်းချည်းပြန်နေတဲ့ ရုပ်ရှင်ကားလို
ဇွတ်အတင်း ဇာတ်ရည်လည်ခိုင်းခံနေရတာမျိုး။
ဆိုတော့ကာ … ဆိုတော့ကာ
ကြီးကျယ်မြင့်မားတဲ့ ဒဿနတွေကိုစားသုံးပြီး
လည်ချောင်းမှာနင်လို့ မျိုမရခဲ့ရင်
မိုးခါးရေနဲ့ကြိတ်မျှောချရတာ ရှက်စရာဟုတ်မဟုတ်
မဲဆန္ဒခံယူကြည့်လိုက်ရင်
ဂုဏ်သိက္ခာမြောက်အဖြေတွေချည်း ခန့်ညားလေးစားဖွယ် ဖြည့်စွက်ကြမှာပေါ့ ဟုတ်ဘူးလား။
ယုံကြည်တဲ့အကြောင်းပြောတော့ ရာဇဝင်
မယုံကြည်တဲ့အကြောင်းပြောတော့ ပုံပြင်
ကိုယ်အောင်မြင်ခဲ့တာတွေပြောရင် သမိုင်း
အဲဒီလို…
ယဉ်ယဉ်ကျေးကျေး ရိုင်းနေကြတဲ့လူတွေက
သိုင်းဝိုင်းထွားကြိုင်းလာလိုက်ကြတာ
ဘယ်ဟာရိုင်းမှန်းဘယ်ဟာယဉ်မှန်းတောင် မခွဲတတ်တော့တဲ့အထိ။
နှမ်းကောင်းကောင်းမဖြူးတတ်ခြင်းက
မွေးရာပါချို့ယွင်းချက်လို့ဆိုရင်လဲရှိပါစေ
အိမ်တွင်းမှုသင်တန်းတော့ သွားတတ်မနေတော့ဘူး။
ခုနောက်ပိုင်းနှစ်တွေမှာ
ဆောင်းတွင်းဟာ နေ့တာရောညတာရော တိုလာသလားမသိ
ဘာမှကိုမလုပ်ရခင် နေဝင်
ဘာမှကိုမလုပ်ရခင် နေထွက်
ပုစ္ဆာမရှိပဲ ထွက်လာတဲ့အဖြေတွေရယ်
အဖြေရှိလျက်နဲ့ အလွတ်ချည်းဖြစ်နေတဲ့ စာရွက်တွေရယ်
မေးခွန်းနံပါတ်လွဲသွားတဲ့ အဖြေလွှာတွေရယ်
ခုံနံပါတ်မေ့မေ့သွားတတ်တဲ့ ကျွန်တော်မောင်ကျောင်းသားရယ်
နေ့ချာချာလည် ညချာချာလည်
မေးစေ့ကို ပွတ်ကြည့်လိုက်တော့
မရိတ်ဖြစ်သေးတဲ့ တွေဝေခြင်းငုတ်စိတွေ ထပ်မံထိုးထွက်နေပြန်တယ်။
(ဂယက်)
